渣哥毛記決裂，毛記有冇損手離場？

 

花生永遠都係香口好味！前幾日，「大渣哥茶記」（下稱「渣哥」）在Facebook專頁表示今年二月初，渣哥向毛記葵涌（01716）正式提出終止合作，要求以2018年當時入股（只計算實際資產及負債）同樣條件之下，以現時實際市值購回毛記葵涌持有之49%股份。進一步指控毛記獅子開大口，並威脅渣哥團隊最終可能會集體辭職以示抗議。

及後，毛記葵涌有限公司昨天（20日）刊發公告，說可能會出售大渣哥餐飲有限公司、大渣哥有限公司、大渣哥（貳）有限公司及渣哥一九九六有限公司。

 誰是誰非，小薯不知道，不過睇下財報食花生，小薯就好有興趣！毛記佔渣哥49%，在毛記財務報表就應該列作「聯營企業」，打開2021年3月的年報，附註14的「於聯營公司的權益」的就會出現大渣哥餐飲有限公司、大渣哥有限公司、大渣哥（貳）有限公司及渣哥一九九六有限公司。以下就是2021年3月的年報的截圖，大家有興趣可以打開份年報看看。 

小薯既八卦點去到呢度就停呢，亦相信大家都有一堆八卦問題！至少都想知這下渣哥講到好大交易咁，實際毛記投資左幾多？毛記又回唔回到本？ 

睇多幾年年報，就知道好多野。在開展之前，小薯先交待一下，

• 大渣哥其實就是九龍灣East Mark的渣哥。
• 大渣哥（貳）就是銅纙灣的大渣哥，現在已經倒閉了！
• 渣哥一九九六，就是賣小食，串燒賣魚旦的渣哥。 

Q1：渣哥講到好大交易咁，實際毛記投資左幾多？

睇年報，毛記於2018年12月31日用245萬買入渣哥一九九六的49%股權；2019年11月6日出資147萬（譚少環出資153萬）開九龍灣大渣哥，再於於2020年8月31日出資出資147萬（譚少環出資153萬）開銅纙灣大渣哥。即是，毛記總共花了539萬在渣哥身上。 

Q2：咁毛記回唔回到本？

答呢條問題，小薯就睇左毛記2019年至2022年的年報，小薯就不截圖了，但就弄了一個summary，大家就會易睇好多。

大家睇上圖，就會發現銅纙灣大渣哥由2020年8月去到2022年3月，總共虧了608萬，所以點解銅纙灣大渣哥會執。毛記佔49%，所以就輸左298萬，即係毛記147萬投資額賠光光，當然，因為銅纙灣大渣哥係有限公司，所以輸極都係147萬。 

九龍灣大渣哥就好少少，由2019年11月到2022年3月，總共賺左315萬。毛記佔49%，所以賺左154萬，出資147萬，叫做大約打個和。不過老實說，小薯經常行開九龍灣大渣哥附近，明顯人流越來越少，而家渣哥內毛記決裂，唔知會唔會執左佢分身家？不過，睇盤數，九龍灣大渣哥有可以問銀行借左錢，而賣器材或者找人頂舖又可唔可以填到個bank窿，就係未知數。 

最後，渣哥一九九六，賣小食最好賺，由2019年1月至2022年3月，總共賺左740萬。毛記佔49%，所以賺左362萬！仲要實收返303萬既現金股息，即是245萬投資額，回報有餘。當然如果加埋另外兩間，其實overall都係輸緊。 

題外話，大家睇渣哥同大渣哥盤數，就發現賣魚旦燒賣真係好賺過開餐廳，難怪成街小食店！同埋，在二線區開餐廳唔一定難做過一線區開餐廳。

 

Q3：毛記點樣獅子開大口？

渣哥聲明說譚少環要求以2018年當時入股（只計算實際資產及負債）同樣條件之下，以現時實際市值購回毛記葵涌持有之49%股份。從聲明字眼看，譚少環當銅纙灣大渣哥total loss，大家一同承擔風險；九龍灣大渣哥那邊，其實毛記反倒欠了大渣哥149萬，所以可能把這筆欠款一筆勾，大家「打和！」就算了，而渣哥一九九六就跟市值買回49%股權。 

既然當初買渣哥一九九六是用實際資產及負債去估值，那小薯睇返2019年年報，當初毛記買渣哥一九九六，渣哥一九九六的淨資產約405萬，49%即是198萬，作價245萬，即是大約P/B = 1.24x。2022年3月，渣哥一九九六的淨資產約524萬，49%即是257萬，如果同樣是1.24x P/B計，回購價就大約318萬。如果以渣哥一九九六2022年年度的利潤約252萬（上年有保就業，實際盈利會較少）毛記佔約123萬，即是P/E大約2.6x；如果看2021年年度的利潤176萬，毛記佔約86萬，即是P/E大約3.7x。 

如果對比大家樂、大快活大約10x P/E，再打一個約40% -50%的低流動性折扣，其實叫價也算是有一定的合理處。當然，上述計算，前題是帳面值=市值，which小薯覺得未必係，而所謂實際資產及負債又是如何分別就是另外一個問題。 

渣哥說毛記開出的價錢是以倍數計，可能是要求將銅纙灣大渣哥賠掉的147萬拿回；再要求用147萬回購九龍灣大渣哥股份，另加149萬無數；最後，用P/E 10x回購渣哥一九九六，即可能大約860 - 1760萬，整體下樓就大約1303 - 2203萬，即是大約是上面計出的回購價318萬的4 - 7倍。即是單用P/E 10x回購渣哥一九九六，都是2.7x– 5.5倍。

 

最後戴個頭盔，以上純屬吹水，小薯沒有內幕消息，亦都唔知上要咁計對不對。以上純綷一個市井食花生手痕之作，切勿認真對待。