用牙膏牙刷，同你講投資（2021年6月6日）

 

今日，有谷友傳了上面果條問題出來，小薯真心覺得幾得意，想同大家開心些牙（SHARE）下。 

其實呢條問題，係考緊係經濟學101既問題（如果有讀經濟可以玩下），主要係關於Complement product（互補產品）既concept。先給幾個經濟學concept： 

• 需求曲線：顯示價格與需求量關係的曲線，是指其他條件相同時，在每一價格水平上買主願意購買的商品量的表或曲線。理論上，價格越高，人們願意購買的商品量就會下降，所以需求曲線通常向下。
• 供給曲線：顯示價格與供給量關係的曲線，是指其他條件相同時，在每一價格水平上賣方願意出售的商品量的表或曲線。理論上，價格越高，賣方就更願意賣出更多的商品，所以供給曲線通常向上。
• 均衡價格：即是商品的供給曲線與需求曲線相交時的價格。這一點代表買家願意付的價格，和購買的數量；與賣方買家願意出售的價格和數量，相等的情況。這個情況是在傳統經濟學上，是隨時間一定會出現。
• 互補產品：指兩種商品之間存在著某種消費依存關係，即一種商品的消費必須與另一種商品的消費相配套（就好像問題中的牙膏和牙刷）。一般而言，某種商品互補品價格的上升，將會因為互補品需求量的下降而導致該商品需求量的下降。

了解左幾個經濟學concept，就正式解答，呢個問題有一個tricky位，就係「牙膏價格上升」，就係呢個位令到呢條問題咁好玩。一個condition，不同角度，就出到兩個答案。首先，大家要知道價格（i.e. 均衡價格）係由供求而來，而個問題既tricky位，就係無講到咩野令到「牙膏價格上升」，如果我地假設，牙膏要在均衡價格的市場下出現價升：

情況一

當牙膏價升，就會令需求減少，之後就會出現供應過剩既情況。如果市場要回到均衡狀態，過剩既供應就會為左出貨而去減價，從而令到牙膏價格回到原本既價格（但咁就否定左問題既前設：「牙膏價格上升」）。所以唯一既情況，就係因為某啲原因，令到一啲供應商退出市場，從而出現整體牙膏供應減少。在牙膏供應減少既情況下，消費者只可以提高佢既意向價去搶牙膏，結果就係牙膏價升（也就附合問題既condition）量跌（因為供應少左引導至需求少左，最後成交量減少）。 

隨之，正因為牙膏同牙刷係互補產品既關係，牙膏量跌，根據傳統經濟學，牙刷個整體需求就會下跌，而假設牙刷供應不變的情況下，就會出現價量齊跌。即是答案C。

 

情況二

因為人口增長或健康教育做得好，令牙膏既整體需求上升，而假設牙膏供應不變的情況下，消費者就只可以提高佢願意付出既價格去搶購現有既牙膏供應。當然，當消費者肯付貴啲去買牙膏，供應商也會願意供應多啲，結果就係牙膏價升（也就附合問題的condition）量升（因為需求增加引導至供應增加，最後成交量增加）。

隨之，正因為牙膏同牙刷係互補產品既關係，牙膏量升，牙刷個整體需求就會上升，而假設牙刷供應不變的情況下，就出現價量齊升。即是答案B。

 

其實，薯圈有位朋友見到呢條問題，就立刻有一個comment：「經濟學有佢既理論，但要知道真正既答案，我地先要係現實搵個已經均衡既牙刷市場。問題就係現實冇呢個市場」，「不過，我會認為A、B、C都錯。因為牙膏只佔刷牙成本好少，不足影響到啲人唔刷牙或用少左牙膏，直到貴到一個點，會少左人刷牙甚至唔刷牙，牙刷需求就會下降，價格同數量下降。但「寫實」啲就係最多用少啲牙膏，可是牙刷折舊同消耗量不會有太大影響，用少啲牙膏都係刷咁耐」（文字經修改，以便於閱讀）

 

呢位朋友真係read my mind，其實當小薯睇到呢條問題，心裡面其實諗到以下四點：

1. 睇問題或者解釋，唔可以睇得咁表面，要想清楚個解釋既背景同前因後果。好似市跌，有財演解釋利息預期升。但問題係，點解利息預期會升，係因為經濟過熱而迫到中央銀行加息去應對（咁樣應該係有利企業盈利，咁個市應該係升），定係經濟太差，貸款人要求更高的利息去補償違約風險（咁樣應該係企業融資成本上升，利潤減少，咁個市應該係跌）？
2. 好多時，理論係一堆假設既前提下得出來既結果，直接啲講，係lab test既結果。當去到現實，考慮埋人既因素，基本上理論就無用，因為變量太多，而假設就變成解釋上的限制。就好似朋友咁講，其實可能牙刷個需求係無影響。
3. 現實歸現實，理論歸理論。其實，在同一個condition下，因為解釋既原因不同，就連理論都能出現不同答案，更逞論現實世界咁多變量，想用一條理論去解釋/預測經濟，從而預測股市，真係mission impossible，所以，點解凱因斯一開始想預測經濟，從而預測股市，都蝕錢收場。
4. 同樣，估值理論都一樣，同樣都有不少假設。其實唔少人以為幫公司做估值，加一個安全邊際，跟住估值買賣，就以為係價值投資。其實如果唔理解公司既商業邏輯，呢個估值其實同你周圍問目標價一樣。價值投資最重要係理解公司既商業邏輯，知道公司點賺錢（好係Peter Lynch咁講，盈利、盈利、盈利），帶出咩價值，而個商業邏輯就係護城河。安全邊際其實係為估值理論提供容錯機會。